સવાર સવાર માં
એવું નો માનતા કે હું નાવાનો ચોર છું. કે મને ચોક્ખાઈ નથી ગમતી. પણ ભલા માણસ, નવેમ્બર મહિના માં, બેંગલોર જેવા સીટી માં સવાર સવાર માં તમે ઠંડુ પાણી રેડી દ્યો એટલે કઈ મજાક ની વાત છે હે ?
જરાક વિચારવું તો જોય ને સામાવાળાનું. આ તો બસ હું કઈ બોલી ના શકું એટલે તમને ગમે ઈ કરવાનું એમ ? દેડકા ને જીવ જાય ને કાગડા ને રમત થાય.
મારે નથી રેવું આયા. મોકલી દ્યો મને પાછો મારે ગામડે , ન્યા હું ભલો ને તળાવ નું પાણી ભલું.
હા બાપા હા , આ ફોટા માં છું એજ હું બોલું છું. હવે મને ને આ બાજુવાળા ને હેઠા ઉતારવા કે ?
અધૂરું જ્ઞાન
તેના બ્રેકફાસ્ટ મિત્રોએ એક દિવસ તેના એક ‘શિષ્ય’ ની પરીક્ષા લેવાનું નક્કી કર્યું. હવે બિચારો શિષ્ય એક અઠવાડિયા થી જ હિન્દી શીખતો હતો. અને કોઈ પણ વિષય પર બોલવાનું કહેતા, તેનાથી આવું એક વાક્ય બહાર આવી ગયું.
“दिव्या भारती की ख़ुदकुशी की गयी थी | ”
જોકે આ વાત બહુ પહેલાની છે અને હવે કદાચ શિષ્ય પારંગત થઇ ગયો હોય તો કહેવાય નહિ. આશા રાખું કે તેને હજી આ ગુજરાતી બ્લોગ વાંચતા નહિ આવડતું હોય 🙂
ઘરે પાછા
ચાઈનામાં ૧૭૯ દિવસ રહ્યા પછી ગયા અઠવાડિયે બેન્ગલૂરૂમાં પરત ફર્યો. પછી ઓફીસમાંથી અઠવાડિયાની રજા લઈને ગુજરાતની ગરમી જોઈ લીધી. આખી સીઝનનો કેરી નો રસ પીવાનો બાકી હતો તે ભાવનગર, મોરબી, ઉપલેટા, તલાળા, અમદાવાદ અને જુનાગઢ ની કેરીઓમાંથી દબાવી દબાવી ને પીધો. જેટલો તડકો આકારો હતો એટલી જ કેરીઓ મીઠી હતી. હવે ઘણું બધું લખવાનું બાકી છે, ઘણી બધી કોમેંટોનો જવાબ આપવાનો બાકી છે, ઘણા બધા બ્લોગની ઘણી બધી પોસ્ટ વાંચવાની બાકી છે. કાલ થી કામે લાગી જવું પડશે.
થોડું (વિ)જ્ઞાન
આપણે આપણા મગજ નો ફક્ત ૧૦% ઉપયોગ કરી શકીએ છીએ. –ખોટી વાત.
કોણે કીધું ? બોલીવુડ ના મુવી માં ? કોઈ વિજ્ઞાનીકે ? કે પછી મુવી માં કીધું કે વિજ્ઞાનીકો એ કીધું !
આપણું શરીર વરસો ના ફેરફારો પછી ઘડાયેલું છે, કુદરત કાળક્રમે શરીર ને જેની જરૂર ના હોય તે અંગ નાનું કરી નાખે અને શરીર માં થી કાઢી નાખે છે.(નવી પેઢી હંમેશા વધુ સ્માર્ટ હોવાનું આ પણ એક કારણ, શરીરરૂપે જ નહિ પરંતુ બુદ્ધિરૂપે પણ) તો જો મગજ ની ફક્ત ૧૦% જ જરૂર હોય તો મગજ નું ૯૦% વધારાનું વજન શરીર ની માથે રાખવાનું કાઈ કારણ ?
ચીન ની દીવાલ ચંદ્ર પર થી પણ જોઈ શકાય છે. — ખોટી વાત.
ફરી થી…કોણે કીધું? નીલ આર્મસ્ટ્રોંગએ ? કે એની હારે ગ્યા તા ઈ બેમાંથી કોઈ ભાઈયુએ ?
ચાલો બીજી રીતે જોઈએ. કોઈ પણ વસ્તુ દુરથી જોઈ શકાય એ માટે શું જરૂરી છે? વસ્તુ “મોટી” હોવી જોઈએ, “લાંબી” હોવી જરૂરી નથી. અડધા ફૂટનું દોરડું પડ્યું હોય તો ૫૦ ફૂટ થી ય દેખાય, પણ ૫ ફૂટ નો લાંબો દોરો પડ્યો હોય તો પણ ૧૦ ફૂટથી નો દેખાય. (ચાલો મારામારી નહિ, ૧૫ ફૂટથી તો નો જ દેખાય, બસ) બસ તો ચીન ની દીવાલ બહુ લાંબી છે, મોટી નહિ. તો ચંદ્ર પર થી તો દેખાવાનો સવાલ નથી.
ઊંડા અજ્ઞાનેથી પરમ જ્ઞાને તું લઇ જા. જય સાયન્સ ભગવાન!
ચીન ની મહાન દીવાલ
ગયા અઠવાડિયે વિશ્વ ની અજાયબીઓમાં થી એક ને જોવા નો મોકો મળ્યો. ત્રણ દિવસ માટે ચાઈનાના પાટનગર
બેઇજીંગ ફરવાનો પ્રોગ્રામ બનાવી લીધો. નાનજીંગ થી રાત્રે ચાઈનાની CRH ટ્રેઈનમાં બેસીને ૧૧૫૩ કિલોમીટરનું અંતર ફક્ત ૮ કલાક માં કાપી ને વહેલી સવારે બેઇજીંગ પહોચી ગયા.
પહેલા જ દિવસે સૌથી પહેલા ચીન ની મહાન દીવાલ જોવાનું નક્કી કર્યું. બદાલીંગ(Badaling) નામ થી ઓળખાતી જગ્યા પ્રવાસીઓમાં વધુ પ્રસિદ્ધ છે. બેઇજીંગ મેઈન સીટીથી આ જગ્યા લગભગ ૮૦ કિલોમીટર દુર છે. કલાક-સવા કલાક ની બસ સફર પછી ત્યાં પહોચ્યા અને ઉતરીને દુર થી જ પેલા તો દીવાલ જોઈ લીધી.
તાપમાન નો પારો શૂન્ય ની આસપાસ હતો અને ખાસ્સો પવન પણ હતો, છતાં અમારા આશ્ચર્ય વચ્ચે મોટી સંખ્યા માં અમારી જેવા મુલાકાતીઓ હતા.
ચીન ની દીવાલ વિષે મને નાનપણ થી એક સવાલ હતો કે, ચીન ની દીવાલ ને “મહાન દીવાલ” કેમ કહેવાય છે. બહુ લાંબી છે તો “લાંબી દીવાલ” કે “મોટી દીવાલ” કેમ નથી કહેતા, અને મહાન જ શા માટે. કદાચ શબ્દો માં સમજાવવું અઘરું છે પણ ત્યાં દીવાલ પર ઉભા રહી ને, લગભગ બે કાર સાથે ચાલી શકે તેટલી પહોળીઅને બંને બાજુ નજર પણ ના આંબે ત્યાં સુધી લંબાતી દીવાલ જોઈને થયું કે કદાચ “મહાન” જ વધુ યોગ્ય શબ્દ છે.
બાકીના બે દિવસો માં બેઇજીંગ માં ટાઈનામેન સ્ક્વેર, ફોરબીડન સીટી, ટેમ્પલ ઓફ હેવન, સમર પેલેસ, ૨૦૦૮ નું ફેમસ ઓલિમ્પિક સ્ટેડીયમ, અને સિલ્ક માર્કેટ ફર્યા. ચાઈનાના બાકી શહેરો કરતા અહી વધારે લોકો અંગ્રેજી બોલે અને સમજે છે. કોઈ ને પણ રસ્તો પૂછો તો out of way જઈને પણ તમને મદદ કરશે. મેટ્રો ટ્રેઈન નું નેટવર્ક જબરદસ્ત છે. અમે ફક્ત બે અજાણ્યા હોવા છતાં ખુબ જ આરામ થી બધી જગ્યાએ ફરી શક્યા.
માળું સારુ, આ જગ્યાએ જઈને હવે તો એક નવી “ખ્વાહીશ” જાગી છે, બાકી ની વિશ્વની અજાયબીઓ જોવાની !
ચાઈના ડાયરીઝ
અત્યારે હું ઓફીસ ના કામે ચાઈનાની ૩ મહિનાની સફર પર છું. નાનજીંગ નામના સીટી માં અત્યારે ૨ ડીગ્રી તાપમાન માં પોસ્ટ લખી રહ્યો છું. આમ તો આ ચાઈનાની બીજી મુલાકાત છે, પણ નાનજીંગ શહેર ની મુલાકાત પહેલી વાર છે. સીટી ની મુલાકાત હજી તો ખાસ થઇ નથી, પણ ગયા અઠવાડિયે આવીને અમુક ચીજ વસ્તુઓ ની ખરીદી કરવા wallmart ગયા હતા ત્યાં ના food department ના અમૂક ફોટા લીધેલા છે, તે અહી મુકું છું. (ચેતવણી: સબળા હદય વાળા એ ખાસ જોવા.) ઘણી બધી સારી વસ્તુઓ પણ જોઈ, પણ આવતી પોસ્ટ માં.
તા.ક. આ સિવાય આજે મેઈલ માં ચેતન ભગત ની HT leadership summit માં આપેલી speech ની લીંક મળી. વાંચવા જેવી છે. અંગ્રેજી માં છે. આ રહી લીંક: http://www.chetanbhagat.com/speeches/speech_1.php
Currently I am in Nanjing, China for a 3 months on a business trip. (Blogspot is blocked in china, so I have to use my this wordpress account to post in English as well!) Although its my second trip to China, its first to Nanjing city. The temperature here is very low at -2 degrees currently. Expected to go down further in January-February. Not roamed around the city much yet, but here are some photos taken at food store at WallMart!
There are lot of other good things in the city and in Chinese culture, but in China Diaries-2. Soon.
P.S.: Apart from that I got a mail today for a speech by Chetan Bhagat at HT leadership summit. Worth reading. Here is the link. http://www.chetanbhagat.com/speeches/speech_1.php
દિવાળી ની ફોટોગ્રાફી
ડીજીટલ કેમેરા માં સાવ થોડા ખર્ચે ફોટા પાડવાની સુવિધા મળ્યા પછી મને પણ ફોટોગ્રાફી નો “શોખ” જાગી ઉઠ્યો. એમાં પાછું orkut પર એક ફોટો મુકેલો એમાં લોકો પૂછ્યું “આ કઈ રીતે?”
અને બસ થઇ ગઈ આ પોસ્ટ તૈયાર !
કઈ રીતે? આ રીતે:
આ ફોટો બનાવવા માટે તમારે જોઇશે: એક મીણબતી, એક ફૂલઝર, એક કેમેરો અને એક ફોટો પાડનાર માણસ(જો તમારે ફોટા માં રહેવું હોય તો).
સૌ પ્રથમ કેમેરા માં shutter-priority મોડ માં જઈ shutter ની સ્પીડ થોડી ‘ધીમી’ કરી નાખો. ઉપર ના ફોટા માં shutter speed ૧/૪ સેકંડ છે.
હવે ફૂલઝર ને છેડે થી સળગાવવા ને બદલે વચ્ચે થી સળગાવો. વચ્ચે થી સળગાવતા ફૂલઝર બે ભાગમાં રોશની આપશે અને ફોટા માં ડબલ રીંગ દેખાશે.
હવે ફૂલઝર ના બીજા છેડા ની ધાતુ ને થોડી વાળી નાખો, જેથી ગોળ ગોળ ફેરવવામાં સરળતા રહે.
બસ, ગોળ ગોળ ફેરવો અને કેમેરામેનને કહો કે પાંચ-છ ફોટો ખેંચી લે. સૌથી સરસ સિલેક્ટ કરો અને રાખી દો દિવાળી આલ્બમમાં!
આ દિવાળી વેકેશન માં લીધેલા બીજા થોડા ફોટાઓ.